Mwenendo wa Maisha ya wazazi hujumuisha maneno, matendo, tabia na desturi za wazazi katika kuendesha Maisha yao ya kila siku. Tafiti mbalimbali za saikolojia ya makuzi ya mtoto zinamtaka Mzazi awe kiongozi wa familia hii inasaidia mtoto katika kipindi cha ukuaji wake. Maisha ya kila siku, matendo na misemo huunda taswira vichwani mwa watoto juu ya Maisha, lugha na mahusiano.

Mabadiliko katika Mfumo wa Utandawazi na Ongezeko la zana za dijiti, yameleta athari kubwa katika malezi ya watoto. Wazazi wanaotumia muda mwingi katika mitandao ya kijamii na kusahau kutoa malezi shirikishi kwa watoto wao. Hali hii imeleta ongezeko kubwa la mmomonyoko wa maadili katika jamii.

Zaidi ya asilimia 80 ya Maisha kwa siku yametawaliwa na matumizi ya zana za dijiti. Zana hizi za dijiti zimekua zinatumika katika malezi ya watoto, wazazi wanatumia zana hizi kama njia ya kuwafanya watoto watulie na wao kuendelea na kazi zao za kila siku.

Athari za matumizi ya dijiti kwa watoto:

Ukuaji hafifu wa ubongo, tafiti zinaonesha kuwa mtoto anajifunza kutokana na matendo ya watu wanaomzunguka. Mtoto akizaliwa, Wataalamu wanasema ya kuwa ubongo wake unakua sawa na boksi lililotupu. Kazi ya wazazi ni kujaza boksi hilo (ubongo) na taarifa mbalimbali ambazo zitamsaidia mtoto katika ukuaji. Ila hali ni tofauti, ulezi wa watoto umeathiriwa na matumizi ya zana za dijiti.

Kushindwa kutengeneza mahusiano, muda mwingi watoto wanatumia katika kuangalia taarifa na michezo mbalimbali katika zana za dijiti, tofauti na zamani ambapo watoto waliweza kucheza pamoja. Michezo hii ilisababisha Ushirikiano, ukuaji wa mahusiano na uwezo wa kufahamu hisia za mtu mwingine tofauti na sasa.

Kuporomoka kwa maadili, katika mitandao ya kijamii kuna taarifa mbalimbali ambazo zinahitaji uangalizi wa karibu kutoka kwa Mzazi. Ila kutokana na kutingwa na kazi, wazazi wanakosa muda wa kukagua na kudhibiti taarifa ambazo watoto wana angalia na kujifunza. Hii imechangia kushuka kwa maadili na kuongezeka kwa vitendo vya kigaidi au vitendo vingine vinavyoendana na hivyo.

Nini kifanyike ili kupunguza tatizo?

Kubadili mifumo ya Maisha, kama kutoa muda wa kukaa na watoto kama zamani. Wazazi wa zamani waliweza kuwafundisha na kuwaonya watoto kwa kuhadithi stori mbalimbali ambazo zilijenga Ushirikiano na kutoa mafunzo ya Maisha angali wadogo.

Kutengenezwa kwa makundi shirikishi ya wazazi wa rika mbalimbali, ambayo yatatoa elimu ya malezi yatakayo endana na tamaduni zetu.